每日一片:巴士行車期間甩軚盤 司機砌唔番被迫停駛-游游國際熱點資訊

每日一片:巴士行車期間甩軚盤 司機砌唔番被迫停駛

作者:Barbie    發表日期:2018-05-22 11:34:08

原來軚盤也有弱不禁風的時候!有網民前日(20日)行經鑽石山,發現在路中心停下的巴士車長「狂擢」軚盤。他原本以為車長正在調校軚盤位置,後來見車長愈擢愈用力,軚盤更突然鬆至「吊吊揈」,便知車輛有問題,最終軚盤亦無法裝崁。不少網民笑稱車長「帶錯軚盤返工」,亦有人認為是組件鬆脫,諷刺司機正在駕駛「積木巴士」。

「嗰陣時傍晚6點40分左右,開頭都唔為意個司機做緊乜嘢,以為佢校緊軚,點知突然間就見到軚鬆到頭揈揈咁,就知出曬事!」網民Cross指,司機正駕駛往返觀塘彩福邨及尖沙咀東的9號九巴,見司機停在路上有所動作,便立即拍下片段。

片段所見,車長上下移動已鬆脫的軚盤,但仍無法將軚盤定位。Cross憶述﹕「都整咗5至6分鐘,期間都有啲乘客行上車頭問發生咩事。」Cross又指,當時正值繁忙時間,已見有車龍,直至他離開時,巴士仍無法行駛。

有眼利的網民指,涉事巴士為富豪超級奧林比安型號,去年曾有同款的新巴在維園發生甩軚盤事件。不少網民留言笑稱:「你個嘢壞咗呀」、「係咪帶錯軚盤返工?」亦有人質疑軚盤並沒有鬆脫,「其實個軚無甩,軚邊有個掣整起咗(可以校高低),只係佢唔識整返實。」不過有網民則反駁,「散咗啦!成個軚盤跌埋一邊!」

九巴回覆東網查詢時指,當晚6時許,一輛開往尖沙咀東的9線巴士,駛至彩虹道近大有街時,懷疑調校軚盤時意外把組件鬆開,遂致電向公司工程車到場維修。車上乘客因而轉乘另一輛巴士離開。


本文來源:http://hk.on.cc/hk/bkn/cnt/news/20180422/bkn-20180422100045696-0422_00822_001.html




Tag:
本文鏈接:http://www.german-wines-ltd.com/110392.html