【港超專版】好爸爸陳偉豪:我仲生存算係咁!-游游國際熱點資訊

【港超專版】好爸爸陳偉豪:我仲生存算係咁!

作者:EmilySarah    發表日期:2017-10-12 04:23:01

今夏加盟港超球隊夢想FC的陳偉豪,無論場內場外都飾演領袖角色,這位後防大將多年來在場上衝鋒陷陣,但原來在他眼中,最難搞的對手竟是家中兩個囝囝!

圖/文:何彥霆

在職業生涯獲獎無數的陳偉豪,回到家中便化身「廿四孝老竇」,幾乎將自己所有時間、空間送給愛兒︰「你就咁睇間屋,個廳啲嘢,基本上都唔係我哋兩公婆嘅,最初搬入嚟,就咁擺部電視喺地下,得張梳化同部電視。一有咗小朋友就多好多『納雜』嘢,例如書、玩具等等……只係得啲相係我哋,最好笑連結婚相都唔知去咗邊!唔單止咁,我仲少咗好多私人時間,依家自己練完波或者老婆放工就即刻返屋企,幫囝囝睇功課,或者同佢玩,放假仲會再忙啲,要更加早起身,有咗小朋友後,生活上有好大改變。」

「偉豪」更笑指湊仔艱難過踢波︰「湊小朋友難啲!喺場上對手粗野,咪同佢鬥過囉!咁小朋友做功課做得唔好,唔通你同佢鬥懶散咩?所以踢波係易好多嘅,遇到任何對手都識點應付,呢個對手(大仔景堯)先難搞!Mark過咁多個前鋒,呢個真係最難搞!」

爆大仔同 「小張峰」落選校隊

現今香港的教育制度要求學生「周身刀、張張利」,不過「偉豪」則表示順其自然,沒有讓兒子背負「名將之後」的壓力,同時踢爆自己跟好友張健峰的兒子都同樣落選學校足球隊︰「『景堯』依家同『張峰』(張健峰)個大仔讀同一間學校,但係佢哋都入唔到校隊,幾諷刺!不過無所謂啦,證明選人方面好公正,係睇能力嘅。」

談到幼子「星霖」,「偉豪」不忘大吐苦水︰「阿哥細個好乖,我哋就生第二個,點知兩兄弟性格完全唔同,哈哈。自從細佬出世後,同層兩梯四伙有兩户搬走咗,樓上樓下都搬屋,唔知關唔關細佬事呢?細仔依家歲半,我哋呢年幾都冇好好瞓過,你知踢波休息係好緊要㗎嘛!其實我有些少佩服自己,喺長期唔夠休息下做一個運動員,可以話係對人類極限嘅挑戰!依家仲生存到都算係咁!」


拍廣告老婆搶Fo

陳偉豪一家四口早前獲邀拍攝家居用品電視廣告,但最後找了演員代替幼子「星霖」,「偉豪」坦言有點遺憾︰「原本想搵我哋一家拍攝廣告,最初有預細佬,因為拍攝檔期預兩日,我哋唔肯定應唔應付到,所以提議細佬嘅角色搵人頂上,點知最後好快拍完,幾個鐘就搞掂,依家諗番有啲後悔冇畀細佬拍!最好笑原本個廣告主角係我,點知最後變咗老婆係主角!」

太太Hana則覺得拍攝過程有趣︰「感覺都幾特別嘅,好彩冇阻人收工!開頭拍幾個鏡頭好唔自然,NG好多次後,表現就好好多。」


本文來源:http://hk.on.cc/hk/bkn/cnt/sport/20171012/bkn-20171012001606988-1012_00882_001.html




Tag:
本文鏈接:http://www.german-wines-ltd.com/29660.html