泛民初選機制提新方案 冷門候選人博翻身

作者:Frederica    發表日期:2019-07-04 02:58:34

明年三月將為四個立法會議席出缺進行補選,被取消議員資格嘅青年新政游蕙禎同梁頌恆似乎無意參與混戰,而劉小麗仲處理緊上訴。泛民主派當中,各陣營都對相關議席虎視眈眈,似乎要靠初選嚟做協調。

近日傳出九龍西同新界東嘅初選備忘錄,計算結果分為電話民意調查同電子及實體市民投票兩部分,各佔五成。但據聞有人喺過去嘅會議上,提出新增埋立法會議員同區議員嘅投票,佔結果嘅兩成。原有嘅方案或令知名度較高嘅人有利,至於新建議嘅方案,就或令某啲低知名度嘅候選人有機翻身。

根據民主動力所草擬嘅初選備忘錄,下月開始嘅初選,如果用現時嘅方案,知名度較高嘅人會有優勢。喺新界東,立法會前議員范國威、鄭家富就或者會佔優,相反學聯前常委張秀賢或冇咁着數;喺九龍西,由於幾位疑似候選人嘅知名度差唔多,用現時嘅方案嘅話就影響不大。

新建議嘅方案其實係參考返零七年立法會港島區補選時所用嘅泛民初選方案。由於新界東有唔少獨立區議員,而且佢哋都有同張秀賢合作,所以採用新建議方案嘅話,張或有優勢。但新方案喺九龍西就未必行得通,事關該區嘅區議員多屬傳統政黨,所以民協馮檢基同民主黨袁海文或會佔優,若真係出現呢個情況,本土派或會「反枱」。

雖然兩個方案各有優勢,但無論技術上、理論上嚟講,兩區所用嘅初選方法需要一致,最後能否達到共識都好難講。


本文來源:http://hk.on.cc/hk/bkn/cnt/news/20171106/bkn-20171106000115655-1106_00822_001.html




Tag:
本文鏈接:http://www.german-wines-ltd.com/36854.html