【我有嘢講】變萬能俠!胡晉銘真‧文武全才-游游國際熱點資訊

【我有嘢講】變萬能俠!胡晉銘真‧文武全才

作者:Charlotte    發表日期:2018-07-22 03:57:16

每到4月考試季節,如果美斯生在香港的「潮文」又是時候無限loop。曾在「我的志願」一欄填上足球員,卻被老師囑咐要好好讀書,香港飛馬19歲小將胡晉銘的童年經歷,如同港孩們的集體回憶。站在夢想與現實的交叉點,「阿銘」咬緊牙關兼顧足球與學業,今季幾乎場場踢足冇失拖,仿效偶像謝雷變身「萬能俠」,能夠一次過滿足曬3個願望,不外乎夠堅持。

「夢想看似不切實際,其實很有意義」,對於曾在前年DSE中文「炒粉」的胡晉銘而言,今時今日重新再寫多一遍,應該更加鏗鏘有力︰「有時我都好羨慕隊友練完波就去做gym,呢啲先係職業球員應有生活,但係行得呢條路,唯有頂落去。」訪問約在城大九龍塘主校園,就讀康樂及旅遊管理副學士的阿銘卻竟然「唔多識路」:「一來課堂多喺九龍灣新大樓,二來而家點都係以足球為先,返學只係上堂,唔會參加課外活動,有時間都用嚟休息。」

學偶像謝雷乜位都踢

性格內向的阿銘自言從小到大也很「宅」,惟獨上到球場判若兩人。小學一年級已在父親薰陶下加入足球興趣班,我的志願一欄例必寫上足球員,卻換來老師好言相勸︰「運動員生涯短暫,呢啲說話聽咗十幾年。升到中學後更加明顯,因為讀書,青年軍好多時練波唔齊人,唔多唔少影響到意志力,好彩最後冇放棄到。」小時候曾當球僮踏上旺角大球場草地,幻想有朝一日一如偶像謝雷瞻前顧後,今季竟能在港超正面交鋒,「Unbelievable」背後,總算實現夢想第一關。
成長在香港足球青訓雨後彩虹年代,從灣仔南華的陳炳安、陳浩然、潘耀焯到後來太陽飛馬青年軍的「牛丸」陳婉婷,阿銘身邊恩師均大有來頭,無奈昔日並肩作戰的好兄弟已各奔前程,就如去季同效香港飛馬的陳柏熹,季前便遠赴美國升學邊踢邊讀。曾經猶豫的阿銘選擇堅持︰「有諗過不如放低學業,但始終香港風氣要求有張大學畢業證書防身,唔讀書好似好蝕底。柏熹喺美國仲要面對文化同生活差異,我哋不時鼓勵對方,幾辛苦都要向住目標奮鬥。相比下,其實最辛苦係高中時,連同港青及球會賽事,一個禮拜有5日放學後要練波,返到屋企已經冇時間做功課,但反而促使我學會揸緊信念,因為我實在太愛足球,愛到唔識形容。」

父親撐場成奮鬥動力

愛字不是單憑用口說,家住東涌的阿銘每早7時起床,熬足幾程港鐵到跑馬地練波,下午又要趕去上堂,卻未試過遲到早退。足球路漫長,幸而阿銘不是孤獨一人︰「Daddy由青年軍開始每場比賽都嚟捧場,而家仲會討論場上表現,比以前多咗話題,亦都因為足球,可以早啲接觸出面世界,比以前識得同人溝通。」人生總要取捨,面對4月接踵而來的考試與功課,還要為香港飛馬備戰菁英盃決賽,阿銘已學會平衡有道︰「唔好做deadline fighter,保持休息及均衡營養。以前我好懶飲水,但為保狀態,而家識得去增添水份同碳水化合物。」見微知著,誰說年輕人就是任性?


本文來源:http://hk.on.cc/hk/bkn/cnt/sport/20170419/bkn-20170419001625394-0419_00882_001.html




Tag:
本文鏈接:http://www.german-wines-ltd.com/9858.html